ഒരു വിത്ത് മുളപൊട്ടി വളര്‍ന്നു വരുന്നപോലെയാണ് ഓരോ പ്രോജക്റ്റും. അതിന്റെ നിര്‍മ്മാണത്തിലുടെനീളം വാസ്തുശില്പ വിദ്യയുടെ സൂക്ഷ്മമായ കണക്കുകളും അഴകളവുകളും ഇഴുകിച്ചേരുന്നു.

വര്‍ത്തമാനകാലത്തില്‍ തുടങ്ങി ഭാവിയിലേക്ക് നീങ്ങുമ്പോള്‍ സമതുലിതവും കാലാതീതവുമായ ഡിസൈന്‍ നയം ഈ വീടിന്റെ അകത്തും പുറത്തും കൂടുതല്‍ തെളിഞ്ഞ് വരുന്നുണ്ട്. വീട്ടുകാരുടെ ആവശ്യങ്ങളുടെ നീതിപൂര്‍വകമായ നടപ്പിലാകല്‍ സാധ്യമാക്കി പ്രശാന്തമായ ഒരു സ്വപ്‌നത്തിന്റെ സാക്ഷ്‌കാരമായി മാറുന്ന വീട്.

പരമ്പരാഗത ആശയമായ മുറ്റം അഥവ കോര്‍ട്ടിയാര്‍ഡിനെ മുഖ്യ ഡിസൈന്‍ ഘടകമാക്കികൊണ്ട് അതിനിരു വശങ്ങളിലുമായി ഒരു ഗൃഹാന്തരീക്ഷത്തിന്റെ സുപ്രധാനങ്ങളായ ലിവിങ് ഡൈനിങ് ഏരിയകളും കിച്ചനും സ്ഥാപിച്ചു കൊണ്ട്; ഇതേ കോര്‍ട്ട്‌യാര്‍ഡിനെ തന്നെ വീടിന്റെ സ്വകാര്യ ഇടങ്ങളായ കിടപ്പുമുറികളുമായി ബന്ധിപ്പിക്കുന്ന കണക്‌ററിങ് ഏരിയയായി മാറുകയും ചെയ്യുന്നു.

ഇരട്ടി ഉയരവും മുകള്‍ നിലയുമായി ബന്ധം സ്ഥാപിക്കുന്ന തുറന്ന നയവും ദൃശ്യപരമായി ഇടങ്ങളെ ബന്ധിപ്പിക്കുമ്പോള്‍ തന്നെ അവശ്യമായ സ്വകാര്യതയും പ്രദാനം ചെയ്യുന്നുണ്ട്.

അകത്തളത്തിന്റെ രൂപകല്പനയില്‍ മരത്തിന്റെ ഉപയോഗം പ്രത്യേകിച്ച് പാര്‍ട്ടീഷന്‍, സ്‌ക്രീനുകള്‍, ചുമരലങ്കാരങ്ങള്‍ മറ്റ് അവശ്യ അലങ്കാര സാമഗ്രികള്‍, ലാംപ്‌ഷേഡ് എന്നിവ ഇന്റീരിയറിന് ലളിതവും പ്രൗഢവുമായ പരിവേഷം പകരുന്നു.

ഇന്റീരിയറിലെ വുഡന്‍ ഡിസൈനര്‍ സ്‌ക്രീനുകള്‍ ഒരു അതിര്‍ത്തിബോധം നല്‍കുകയും അതേസമയം സുതാര്യമായ ഇവ വിവിധ ഇടങ്ങളെ തമ്മില്‍ ബന്ധിപ്പിച്ചു വിഷ്വല്‍ കണക്റ്റിവിറ്റി സാധ്യമാക്കികൊണ്ട് ഗൃഹവാസ്തുകലയിലെ ജനപ്രീയ ഡിസൈന്‍ ഘടകമായി മാറുകയും ചെയ്തിരിക്കുന്നു.

ഓപ്പണ്‍ പ്‌ളാനിന്റ സാരാംശം ഉള്‍കൊണ്ട് പച്ചപ്പും വെളിച്ചവും നല്‍കി ഇന്‍ഡോര്‍ ഔട്ട്‌ഡോര്‍ ഏരിയകളെ ആകര്‍ഷകമായി, കലപരമായി സമ്മേളിപ്പിച്ച് ഗൃഹാന്തരീക്ഷം കുളിര്‍മയുളളതാക്കി ജീവസുറ്റതാക്കുന്ന ബോധപൂര്‍വമായ ഡിസൈന്‍ നയം പിന്‍തുടര്‍ന്നിരിക്കുന്നു.

വെണ്‍മയാര്‍ന്ന ചുമരുകളും ഇറ്റാലിയന്‍ മാര്‍ബിളിന്റെ പ്രൗഢി എടുത്തു നില്‍ക്കുന്ന തറയും മരത്തിന്റ ഡിസൈന്‍ എലമെന്റുകളും എല്ലാം സമന്വയിപ്പിച്ചു മിനിമലിസത്തിന് ഒരു നൂതന ഭാഷ്യം നല്‍കികൊണ്ട് അകത്തളത്തെ നിര്‍വചിച്ചിരിക്കുന്നു.

അകം പോലെ തന്നെ പുറവും വളരെ തന്മയത്വത്തോടെ, കാലാവസ്ഥക്ക് യോജിച്ച വിധം ചിട്ടപ്പെടുത്തിയിരിക്കുന്നത് പ്‌ളോട്ട് നല്‍കുന്ന സാധ്യതകളെ അങ്ങേയറ്റം മാനിച്ചു കൊണ്ടും ഉപയാഗപ്പെടുത്തി കൊണ്ടുമാകുന്നു.

 

 Design :AR.M M Jose

 Mindscape Architects

 Puthumana Tower

 Pala, kottayam (dt)

 Mob:9447367326

Client : Biju Kodaliparambil

Location Iringalakuda

Plot :35 Cent

Total earia:5720 sqft